د پاکستان د بهرنیو چارو وزارت د افغانستان هند او ایران ترمنځ د چابهار بندر له لارې د ټرانزيټي معاملاتو د پیل په اړه د اسلام اباد دریځ څرګنده کړه او ټینګار کوي چې اسلام اباد په دې اړه کومه اندیښه نه لري.
په اسلام اباد کې د پاکستان د بهرنیو چارو وزارت یوه ویاند محمد فیصل د ایران له تهران ټامیز ورځپاڼې سره د مرکې پر مهال ویلي، چې د افغانستان، هند او ایران له خوا د چابهار بندر د فعالیتونو پیل په دې معنی نه ده چې د پاکستان پر خلاف او یا هم د پاکستان او چین د اقتصادي دهلېز پر خلاف یوه ائتلاف رامنځته شوې ده.
نوموړی زیاته کړه، چې له افغانستان، ایران، او چین سره د پاکستان سوداګریزي او اقتصادي اړیکې به د تل په څېر دوام ومومي.
ښغلي فیصل ټینګار وکړ، چې افغانستان حق لري له ټولو ګاونډیو هېوادونو سره ټرانزیټي اړیکې ولري.
د ښاغلي فیصل په وینا، ایراني چارواکو له دې وړاندې پاکستان ته اطمینان ورکړي چې چابهار او د پاکستان ګوادر بندر د یوبل بشپړونکی دی.
دا په داسې حال کې ده چې هند حکومت تیره میاشت په رسمي ډول له افغانستان سره د چابهار بندر له لارې خپل صادارت پیل کړل او ټاکل شوې چې د دغه بند له لارې ۱،۱ میلیون ټونه غنم په راتلونکو ورځو کې افغانستان ته صادر شي.