ده‌ها تن از بازرگانان و رانندگان موتر های حامل کالاهای تجاری از دیروز به این‌سو در اعتراض به ندادن ویزای ی بازرگانی برای آنها ، مرز مشترک بازرگانی افغانستان-تاجیکستان را مسدود کرده‌اند.
به گزارش مانیتورینگ خبرگزاری آوا، این راننده ها می‌گویند: حکومت افغانستان برای ۲۵۰ رانندۀ تاجیکستانی ویزای ۶ ماهه می‌دهد، اما حکومت تاجیکستان برای ۲۵ رانندۀ افغانستان تنها ویزا ی یک ماهه می‌دهد.
به گفتۀ آنان، سفارت تاجیکستان توزیع ویزا برای بازرگانان افغانستان را هم محدود کرده است. آنها هشدار می‌دهند که اگر به مشکل‌شان رسیدگی نشود، بندر بازرگانی شیرخان را همچنان بسته نگه می‌دارند.
معترضان می‌افزایند: با بازرگانان و راننده‌های افغانستانی از سوی حکومت تاجیکستان عمل مشابه صورت نمی‌گیرد.
سید محمود دانش، سخنگوی والی قندوز نیز اعتراض بازرگانان را برحق دانسته می‌گوید که دو روز پیش نامه‌ای به خاطر حل مشکلات بازرگان به ارگان‌های محلی فرستاده‌اند.
او می‌گوید: به زودی به این مشکل بازرگانان رسیدگی می‌شود.