محمد اشرف غنی؛  رئیس جمهور کشورمان در دیدار با صدراعظم تاجیکستان، خواهان افتتاح کنسولگری های این کشور در ولایات قندوز و بدخشان شد.
به گزارش خبرگزاری آوا، رئیس جمهور غنی بعد از ظهر روز گذشته با «قاهر رسول زاده» صدراعظم تاجیکستان در دوشنبه دیدار و گفتگو نمود.
در این دیدار آقای غنی در رابطه به مشکلات ویزه تاجران افغانستانی و شماری از باشندگان ولایت بدخشان که به تاجیکستان رفت و آمد دارند، صحبت کرد و از صدراعظم تاجیکستان خواست که کشورش کنسولگری های خویش را در ولایات قندوز و بدخشان افتتاح نماید.
رئیس جمهور غنی افزود که نیروهای امنیتی افغانستان امنیت کنسولگری های تاجیکستان در قندوز و بدخشان را تامین می کنند.
همچنین رئیس جمهور غنی در رابطه به مشکلات افغانستانی های مقیم تاجیکستان که از سوی پولیس آن کشور مورد آزار و اذیت قرار می گیرند، نیز صحبت کرد.
وی در این دیدار بر انتقال سریع زندانیان افغانستانی که وضعیت صحی مناسب ندارند، از تاجیکستان به کشورمان تاکید کرد.

با این حال «قاهر رسول زاده» صدراعظم تاجیکستان، سفر رئیس جمهور غنی را به تاجیکستان در راستای گسترش و تحکیم روابط میان دو کشور مهم خواند.
وی به رئیس جمهور کشورمان اطمینان داد که کشورش برعلاوه همکاری های دوامدار با افغانستان، در زمینه حل مشکلات افغانهای مقیم تاجیکستان نیز توجه نموده، وضعیت آنانرا مورد بررسی قرار خواهد داد.
گفتنی است که رئیس جمهور کشورمان روز گذشته در راس یک هیات عالیرتبه عازم دوشنبه پایتخت تاجیکستان شده است.