مقامات کشور تاجیکستان و افغانستان صبح امروز در منطقه مرزی میان هر دو کشو اعلام کردند که تلاش ها برای رهایی مرزبان تاجیکی ادامه دارد.
سید سرور حسینی، سخنگوی قوماندانی امنیه قندوز به خبر گزاری آوا گفت که پس از انجام تحقیقات گسترده با همکاری نیروهای افغان و تاجیک مشخص شد که مرزبانان دولت تاجیکستان توسط طالبان در خاک افغانستان ربوده شده اند و تا کنون هیچ اثری از این افراد، در دست نیست.
این در حالیست که چند روز قبل مقامات نظامی ولایت قندوز اعلام کردند که طالبان ۴ سرباز مرزی تاجیکستان را به اسارت گرفته اند.
تاجیکستان در ابتدا این خبر را رد کرد، اما پس از تحقیقاتی که در مناطق مرزی خود با افغانستان انجام دادند، مشخص شد که این افراد توسط طالبان ربوده شده اند.

سید سرور حسینی در ادامه سخنانش گفت: دراین اواخر در صفوف طالبان شماری از اتباع تاجیکستان دیده می شود و تاکنون چندین تن آنها به خاطر انجام حملات تخریبی دستگیر شده اند.
وی افزود: شمار زیادی از طالبان خارجی و نیروهای القاعده از خاک پاکستان و تاجیکستان وارد افغانستان شده و پس از آن در مناطق دوردست این ولایت برای سازماندهی و انجام حملات تخریبی جابجا می‌شوند.

گفتنی است که مرزبانان تاجیکستانی هفته گذشته به صورت غیرقانونی وارد جنگلی در ولسوالی "امام صاحب" ولایت قندوز شده بودند و مشغول قطع درختان بودند که طالبان به آنان حمله می کنند.
مقامات تاجیکستان گفته اند از طریق دیپلمات های خود در افغانستان این مساله را در اولویت قرار داده اند و در حال حاضر مشغول بررسی آن هستند.

با این حال قرار است مقامات دولتی تاجیکستان و افغانستان با همکاری یکدیگر مرزبانان تاجیکستانی را از اسارت طالبان آزاد کنند. مقامات افغان گفته اند که آزادی آنان نیاز به زمان دارد.