کد خبر 217519
تاریخ انتشار: سه شنبه 16 جَدْی 139919:04

گفت‌و‌گوهای صلح و حمایت دولت تاجیکستان از افغانستان

سفیر تاجیکستان گفت:دولتش در مذاکرات صلح در کنار دولت افغانستان خواهد بود.

به گزارش مانیتورینگ خبرگزاری صدای  افغان(آوا)،سفیر تاجیکستان در کابل در دیدار با محمد حنیف اتمر، وزیر خارجه افغانستان حمایت کشورش را از روند صلح جاری که در دوحه میان هئیت افغانی و طالبان جریان دارد اعلام کرد و گفت: تاجیکستان در این زمینه در کنار مردم و دولت افغانستان قرار دارد. 

شریفی سعدی، سفیر تاجیکستان در کابل در رابطه با گفت‌وگوهای صلح بین‌افغانی گفت: «جمهوری تاجیکستان از تلاش‌های دولت افغانستان در راستای تحکیم صلح و موفقیت مذاکرات در دوحه ستایش می‌کند و نیز تاکید دارد که تاجیکستان از روند صلح جاری در افغانستان حمایت نموده و در کنار دولت و ملت این کشور قرار خواهند داشت.

 سعدی، همچنین آمادگی کشورش را برای راه‌اندازی یک نشست سه جانبه میان افغانستان، تاجیکستان و ایالات متحده آمریکا که قرار است به تاریخ ۱۸ جدی‌، سال جاری برگزار شود نیز به وزیر خارجه افغانستان اعلام کرد. 

سفیر تاجیکستان در این دیدار نیز همکاری‌های کابل و دوشنبه را در عرصه‌های انرژی و انتقال برق مهم خواند و گفت: همکاری‌ها میان کابل و دوشنبه در عرصه‌های انرژی، انتقال برق و ساخت نیروگاه‌های مشترک تولید برق در امتداد دریای پنج در روابط میان دو کشور حایز اهمیت است.

محمد حنیف اتمر، نیز در این دیدار از جمهوری تاجیکستان به عنوان یک همسایه نیک و کشور برادر یادآوری کرد و گفت:کابل آماده است تا در همه زمنیه‌ها به خصوص در سطوح دو جانبه، سه جانبه و چند جانبه با دوشنبه همکاری نموده و برای تطبیق پروژه‌های مشترک اقتصادی و گسترش روابط سیاسی، آموزشی و فرهنگی مشترکا کار و فعالیت نماید.

قابل یادآوری است که دو طرف در این دیدار در رابطه با برگزاری کنفرانس‌های اقتصادی منطقه‌ا‌ی، احداث راه آهن، ایجاد مناطق آزاد اقتصادی در امتداد مرزهای دوکشور، استفاده از تجارب و مهارت‌های متخصصان طرفین در ساختن شهرها و بندهای آب و تشریک مساعی در امر مبارزه با تروریسم، مواد مخدر و جنایات سازمان یافته نیز بحث و گفت‌وگو کردند. 

باید گفت: این سخنان سفیر تاجیکستان در کابل در حالی ابراز می‌شود که چند هفته پیش نیز عبدالله عبدالله، رئیس شورای مصالحه ملی افغانستان که برای حصول اجماع منطقه‌ای بابت گفت‌وگوهای صلح بین‌افغانی به تاجیکستان رفته بود با رئیس جمهور، رئیس مجلس نمایندگان، علما و سایر مقامات حکومتی این کشور دیدار داشت و در رابطه با مذاکرات صلح بحث و گفت‌وگو کردند.

مقامات دولتی تاجیکستان هر یک حمایت‌شان را از مذاکرات صلح جاری اعلام نمودند و بر ختم جنگ، تامین صلح و ثبات دائمی در افغانستان تاکید کردند. 

شهروندان افغان نیز تاجیکستان را دوست واقعی مردم و دولت افغانستان دانسته اظهار داشتند: تاجیکستان هیچ‌گاه تلاش نکرده است که افغانستان را ناامن بسازد و گروه‌های تروریستی به ویژه طالبان را مستقیم و یا غیر مستقیم حمایت مالی و تجهیز نظامی کند. «ما از مردم تاجیکستان و دولت این کشور خوشنودیم و آرزو داریم که افغانستان نیز مانند تاجیکستان صاحب امنیت و ثبات دائمی شود. 

سوسن رحمتی، دانشجوی علوم سیاسی نیز اظهار داشت:مردم تاجیکستان هم‌زبان، هم‌فرهنگ و هم‌دین ما هستند و این کشور همیشه در میدان سیاست حامی نظام کنونی و گذشته ما بوده است و همیشه تلاش کرده است که روابط خود را با ملت و دولت افغانستان به گونه حسنه و نیک نگهدارد و به پیش ببرد. ما از دولت تاجیکستان می‌خواهیم در زمینه‌های که دولت و ملت‌شان توانایی دارند دولت و ملت ما را نیز حمایت کنند تا ما نیز بتوانیم از مشکلات بیرون شویم و افغانستان را به آرزویی که داریم برسانیم.

#گفتگوی_صلح

#حمایت_تاجیکستان

#هم زبان_هم فرهنگ_روابط_حسنه

نظر شما

  • AvaAdvertisement

مطالب مرتبط

آخرین اخبار

  • AvaAdvertisement