په سویل کې د افغان هوایي ځواک قوماندان جنرال عبدالرازق شیرزي وایي، د بلک هاک هلیکوپټرو لپاره د افغان پیلوټانو لومړنی جوپه چې په کې ۶ پیلوټان شامل دي، تیره ورځ د خپل فراغت سندونه یې ترلاسه کړل.
نوموړی زیاته کړه، چې دغه افغان پیلوټان د بلک هاک هلیکوپټرو په برخه کې درې میاشتنی روزنیزه دوره پای ته ورسوله.
د جنرال شیرزي په وینا، دغه پیلوټان د کندهار په پوځي هوایي ډګر کې روزنه ورکړل شوې ده.
په افغانستان کې د ناټو غوڅ ملاتړ ماموریت هم په یوه بیان کې لیکلي، چې د دغو پیلوټانو له فراغت سره سم به د افغان هوایي ځواکونو په وړتیاو کې زیاتوالي راشي.
د ناټو غوڅ ملاتړ ماموریت د دغو پیلوټانو فراغت یو تاریخي ګام وباله چې د ناټو غوڅ ملاتړ ماموریت یوه برخه جوړوي.
د چارواکو په وینا، په پام کې ده چې افغان هوایي ځواکونه تر ۲۰۲۴ میلادي کال پورې ۱۵۰ بلک هاک هلیکوپټرونه ترلاسه کړي.
افغان هوایي ځواکونو ته دغه الوتکې د پنټاګان د یوې برنامې پر اساس ورکړل کیږي چې کابو یوه میلیارډ ډالر لګښت به ولري.
د امریکا پوځ د چارواکو په وینا، ټاکل شوې چې د هلیکوپټرو له ډلې څخه ۵۸ الوتکې له راکټ اندازنو او نورې وسلې سره تجهیز شي تر څو د هوایي بریدونو لپاره ور څخه کار واخیستل شي.