د امریکا ولسمشر د اوکرایین له ولسمشر ولادیمیر زیلینسکي سره په ټیلیفوني خبرو کې له هغه سره ژمنه کړې چې دغه هېواد ته به پرمختللی هوايي دفاعي سیسټم ولېږي.

آوا: د امریکا ولسمشر جوبایډن د اوکراین له ولسمشر سره په خپله وروستۍ ټیلیفوني خبرو کې ژمنه کړې چې دغه هېواد ته به یو پرمختللی هوايي دفاعي سیستم واستوي.
 
په دې ټلیفوني خبرو کې چې د دوشنبې په ورځ (میزان ۱۸) تر سره شوه، بایډن د اوکراین ولسمشر ته ډاډ ورکړ چې هغه به دغه هېواد ته "د خپل دفاع لپاره ټول اړین تجهیزات ورکړي".
 
د امریکا ولسمشر هم د دوشنبې په ورځ په کیف او نورو اوکرایني ښارونو د روسیې له پراخو هوايي بریدونو وروسته له زیلینسکي سره خپله خواخوږي څرګنده کړه.
 
ولادیمیر زیلینسکي، په ټویټر کې د یو پیغام په خپرولو سره، دا خبرې "رغنده" وبللې او ټینګار یې وکړ چې هوایی دفاع د اوکراین لومړی لومړیتوب دی.
 
هغه دا هم لیکلي چې هیواد یې د G7 هیوادونو په اړه د سخت دریځ نیولو او د ملګرو ملتونو د عمومي اسامبلې د پریکړه لیک ملاتړ کولو لپاره د متحده ایالاتو مشرتابه ته اړتیا لري.
 
دا په داسې حال کې ده چې د دوشنبې په ورځ د اوکراین په پلازمېنه کییف او د هغه پر ځینو ښارونو د روسیې له پراخو بریدونو وروسته لسګونه کسان مړه او ټپیان شول.