په ژورې خواشينۍ سره مو خبر ترلاسه کړ چې دهېواد دښمنانو يو ځل بيا په يو ستر جنايت لاس پورې کړ او دټولو اسلامي اوانساني موازينو پرخلاف يې دسردار محمدداوودخان په روغتون بريدوکړ او زموږ ديوشمير بيګناه هېوادوالو دشهادت اوټپي کيدو سبب شول.
انالله و انااليه راجعون
روغتون داسې ځاى دى چې پکې دناروغانو درملنه کيږي اوپه هيڅ دين او آيين کې په هغه بريد جايز نه دى . کاشکي دغه شان بريدونه داسلام دمقدس دين په نامه چې دناروغانو اوضعيفانو رعايتول يې يوه مهمه ديني وجيبه بولي نه ترسره کيده .
ددغه ملت مکار او قسم خوړلو دښمنانو ددغه شان عملونو په ترسره کولو سره ثابته کړه چې ددغه مسلمان او اتل ملت دبچيانو په وژلو کې له هيڅ راز ظلم او وحشت څخه ډډه نه کوي.
دافغانستان دعالمانو سراسري شورا دغه عمل په کلکه غندي اودالله (ج) له دربار څخه شهيدانوته د فردوس جنت ، ټپيانو ته دسملاسي روغتيا اوپاتې کسانو او دوستانو ته يې دجميل صبر هيله کوي اوله مسوولو بنسټونو څخه غوښتنه کوي چې ددغه شان مرکزونو دښه امنيت دتامينولو په برخه کې زياته پاملرنه وکړي او ددغه شان جنايتونو سازمان ورکوونکي او عاملين تعقيب او دقانون منګولو ته يې وسپاري.