وزارت امور خارجه حکومت سرپرست می‌گوید که کشور چین در سومین نشست "کمک‌های بشری و بازسازی اقتصادی افغانستان" تعهد کرده، که با افغانستان در زمینه‌های اسکان مجدد مهاجران برگشته به کشور و درمان بیماران مبتلا به بیماری سوراخ قلب، کمک می‌کند.

خبرگزاری صدای افغان (آوا) - کابل: دفتر مطبوعاتی وزارت امور خارجه امارت اسلامی امروز (پنجشنبه، ۳۰ حمل) با نشر مطلبی در شبکه اکس گفته که سومین نشست مکانیزم‌های ارتباطی میان هیأت امارت اسلامی و کشور چین برای "کمک‌های بشری و بازسازی اقتصادی افغانستان" در بیجینگ برگزار شده است.

وزارت خارجه گفته است که طرف افغانستان پیشنهادهای خود را برای افزایش و تأثیرگذاری کمک‌های چین در این نشست ارائه کرده است.

این وزارت افزوده که چین تعهد کرده با افغانستان در زمینه‌های اسکان مجدد مهاجران برگشته به کشور و درمان بیماران مبتلا به بیماری سوراخ قلب، کمک می‌کند.

در این نشست، در مورد موضوعاتی از قبیل افزایش تجارت میان چین و افغانستان، استخراج معادن از جمله معدن مس عینک، ارتقای ظرفیت کارمندان اداره‌های حکومت سرپرست، گفتگو شده است.