شهروندان نیمروز صبح امروز در یک اقدام نمادین و با حضور مسوولین دولتی، اعضای شورای ولایتی و جامعه مدنی به پاک‌کاری شهر پرداختند.
به گزارش خبرگزاری آوا، در این اقدام نمادین، جاده‌های شهر زرنج مرکز ولایت نیمروز و جوی‌های نواحی مختلف شهر از وجود زباله‌ها پاک سازی شد.
والی نیمروز طی سخنانی کوتاه پاک‌کاری شهر را وظیفه‌ی تمام شهروندان دانشت و افزود که هر شهروند مسوولیت دارد تا در حفظ محیط زیست با ارگان‌های مربوطه‌ همکاری داشته باشد.
انجینر "محمد سمیع" افزود که فرهنگ حفاظت از محیط زیست باید در میان مردم نهادینه شده و تقویت گردد.
وی همچنین از مردم نیمروز خواست تا در سرسبزی شهر سهیم شده و نهال بکارند.
یادآور می‌شویم که در این حشر عمومی، چندین کیلومتر از سطح شهر زرنج پاک کاری گردید.
همچنین این برنامه عمومی به منظور ایجاد فضای سالم و پاک در سطح شهر زرنج و به ابتکار مقام ولایت راه‌اندازی شده بود.